उधाडीह, सुलतानगंज केरऽ निलेश नयन के आतंकी मुठभेड़ म॑ शहीद होला प॑ सगरे शोक के लहर | News in Angika

सुल्तानगंज । उधाडीह, सुलतानगंज केरऽ निलेश नयन केरऽ आतंकी मुठभेड़ म॑ शहीद होला प॑ अंग देश म॑ सगरे शोक के लहर व्याप्त होय गेलऽ छै । जम्मू-कश्मीर केरऽ बांदीपोरा म॑ बुधवार भोरे पाँच बजे आतंकी सिनी के साथ होलऽ मुठभेड़ म॑ वायुसेना केरऽ दू गरुड़ कमांडो कॉर्पोरल निलेश नयन आरू सर्जेंट मिलिंद किशोर शहीद होय गेलै । निलेश नयन भागलपुर के सुल्तानगंज प्रखंड के उधाडीह गाँव केरऽ निवासी पिता तरुण कुमार सिंह, माय बुलबुल देवी केरऽ सुपुत्र छेलै । मुठभेड़ म॑ दू लश्कर आतंकी भी मारलऽ गेलऽ छै ।

कश्मीर म॑ आतंकवाद फैलला के २७ साल म॑ पहलऽ बार आतंकवादी सब के खिलाफ कार्रवाई म॑ वायुसेना के कोय जवान शहीद होलऽ छै। निलेश नयन श्रीनगर केरऽ आर्मी कैंप म॑ ट्रेनिंग ल॑ रहलऽ छेलै ।

रक्षा मंत्रालय केरऽ प्रवक्ता अनुसार राख पारिबल क्षेत्र म॑ आतंकी सब के छिपै के सूचना छेलै । भोरे पौने पाँच बजे संयुक्त अभियान शुरू होलै । वायुसेना के कमांडो भी अनुभव आरू ट्रेनिंग लेली एकरा म॑ शामिल होलऽ रहै ।

निलेश तीन महीना के विभागीय प्रशिक्षण लेली श्रीनगर केरऽ आर्मी कैंप म॑ गेलऽ छेलै । निलेश केरऽ शहादत के सूचना एयरफोर्स चंडीगढ़ कैंप स॑ हुनकऽ बाबूजी क॑ भोरे १० बजे मिललै । हुनका बतैलऽ गेलै कि पार्थिव शरीर क॑ दानापुर कैंट भेजलऽ जैतै । हुनकऽ पिता न॑ शहीद बेटा केरऽ पार्थिव शरीर घर तलक पहुंचाबै के बात कहल॑ छै ।

गुरुवार क॑ हवाई जहाज स॑ शहीद निलेश केरऽ शव पूर्णिया केरऽ चूनापुर हवाई अड्‌डा पहुंचतै । वहां स॑ शव क॑ सुल्तानगंज लानलऽ जैतै ।

निलेश न॑ २००४ ई. म॑ एयरफोर्स ज्वाइन करन॑ छेलै । निलेश केरऽ शहीद होय के सूचना सबस॑ पहल॑ मुंबई म॑ रही रहलऽ हुनकऽ बहनोई मुकेश मेहता क॑ मिललै । हुनी ई घटना के जानकारी अपनऽ ससुर आरू निलेश केरऽ पिता तरुण सिंह क॑ देलकै ।

बेटा केरऽ शहीद होय के सूचना मिलथैं पिता के तबीयत बिगड़ी गेलै । माय बुलबुल देवी पहलै स॑ ही बीमार चली रहलऽ छेलै।
निलेश न॑ २०१५ म॑ बिना दहेज रायपुर केरऽ मिनीषा नयन स॑ अंतरजातीय शादी करन॑ छेलै ।

अपनऽ देश म॑ अमन-चैन बनैल॑ रखै लेली शहीद होय वाला अंगदेश केरऽ ई वीर योद्धा निलेश नयन क॑ अश्रुपूर्ण भावभीनी श्रद्धांजलि । निलेश नयन सदा अमर रह॑, भगवान हुनकऽ आत्मा क॑ चिर शांति दिअ॑, प्रभु स॑ ऐन्हे कामना छै ।