सुलतानगंज ( भागलपुर) , 5 मार्च 2022 ।

अखिल भारतीय साहित्य कला मंच केरो प्रदेश महासचिव सुधीर प्रोग्रामर नँ अंगिका भाषा क 8मो अनुसूची मँ डलबाबै लेली जदयू के राष्ट्रीय अध्यक्ष, सांसद राजीव रंजन सिंह उर्फ ललन सिंह क ज्ञापन सौंपलकै ।

सांसद राजीव रंजन सिंह क सौंपलो गेलो ज्ञापन मँ कहलो गेलो छै कि अंगिका, अंग महाजनपद केरो करोड़ों लोगो के भाषा छेकै । तिलकामाँझी भागलपुर विश्वविद्यालय मँ पिछला दू दशक सँ अंगिका के पढ़ाई होय रहलो छै । अंगिका मँ हजारों किताब प्रकाशित होलो छै । दूरदर्शन, आकाशवाणी सँ अंगिका भाषा के कार्यक्रम प्रसारित होतें रहै छै । बिहार सरकार द्वारा अंगिका अकादमी के गठन भी करलो गेलो छै ।अंग प्रदेश ऐला प प्रधानमंत्री आपनो भाषण अंगिका भाषा सँ ही प्रारंभ करै छै ।

हुनका सँ आग्रह करलो गेलो छै कि अंगिका भाषा क संविधान केरो 8मो अनुसूची मँ शामिल करबावै लेली लोकसभा मँ आवाज उठैलो जाय ।