माघी पूर्णिमा पर गंगा तटऽ प॑ स्नान लेली श्रद्धालुओ के सैलाब उमड़लै | News in Angika

भागलपुर : माघी पूर्णिमा केरऽ अवसर पर बुधवार क॑ जिला केरऽ विभिन्न गंगा तटऽ प॑ स्नान करै लेली श्रद्धालुओ के सैलाब उमड़ी गेलै । खासकरी क॑ शहरऽ के बरारी सीढ़ी घाट, पुल घाट, मुसहरी घाट आरनि पर स्नान करै लेली मध्य रात्रि स॑ ही लोगऽ के तांता लगी गेलऽ छेलै । लोगेंसिनी माय गंगा , भगवान सूर्य आरनि देवी-देवता सिनी केरऽ पूजा-अर्चना करलकै ।

एकरऽ अलावा शहर के विभिन्न मंदिर बूढ़ानाथ, शिव शक्ति मंदिर, भूत नाथ मंदिर, दुग्धेश्वर नाथ, कुपेश्वर नाथ आरनि म॑ पूजा करै लेली श्रद्धालुओ के भीड़ उमड़ी परलै । माघी पूर्णिमा क॑ ल॑ क॑ सुबह १० बजे तलक गंगा घाट मार्ग प॑ श्रद्धालुओ के एतना भीड़ बढ़ी गेलऽ छेलै कि तिलकामांझी चौक, बरारी मार्ग व कचहरी चौक पर जाम के स्थिति बनी गेलऽ रहै । हालांकि पुलिस केरऽ पुख्ता इंतजाम करलऽ गेलऽ छेलै । शहर केरऽ विभिन्न स्थानऽ, नया बाजार में भगवान सत्यनारायण के प्रतिमा स्थापित करी क॑ पूजा करलऽ गेलै ।

माघी पूर्णिमा प॑ चंद्रग्रहण लगै के कारण एक दिन पहलौं लोहापट्टी, सोनापट्टी आरू अन्य स्थानऽ में भगवान सत्यनारायण के पूजा मंगलवार क॑ ही करी लेलऽ गेलै । सोनापट्टी में मोहद्दीनगर केरऽ कीर्तन मंडली द्वारा अष्टयाम संकीर्तन भेलै । साथ ही घर-घर भगवान सत्यनारायण के पूजा-अर्चना भी करलऽ गेलै । आदमपुर चौक के समीप भी भगवान सत्यनारायण के पूजा होलै । जेकरा में पंडितऽ द्वारा भगवान सत्यनारायण के कथा करलऽ गेलै आरू मुहल्ला के लोग एकजुट होय क॑ कथा श्रवण करलकै ।

(दैनिक प्रभात खबर केरऽ खबर प॑ आधारित )