कैटेलोनिया न॑ ख़ुद क॑ आज़ाद देश घोषित करलकै | News in Angika

बार्सिलोना । कैटेलोनिया न॑ ख़ुद क॑ स्पेन स॑ अलग होय क॑ अपना क॑ एगो आज़ाद घोषित करी लेल॑ छै ।

बी.बी.सी. आरू अन्य टी.वी. समाचार के अनुसार कैटोलोनिया में संवैधानिक संकट आरू गहराय गेलऽ छै । प्रांतीय संसद न॑ बहुमत सें आज़ादी के पक्ष में वोट करलकै जबकि स्पेन केरऽ सीनेट न॑ कैटेलोनिया केरऽ स्वायत्तता समाप्त करै के पक्ष में फैसला लेलकै ।

स्पेन केरऽ सीनेट केरऽ ई फैसला सें कैटेलोनिया के स्वायत्ता के संवैधानिक दर्ज़ा समाप्त होय गेलै आरू अब॑ ओकरा प॑ स्पेन केरऽ सीधा शासन होतै ।

एकरऽ पहल॑ शुक्रवार क॑ ही कैटेलोनिया केरऽ १३५ सीट वाला प्रांतीय सीनेट में आज़ादी के पक्ष म॑ ७० मत पड़लै जबकि एकरऽ विपक्ष में १० मत पड़लै । दू सीनेटर अनुपस्थित रहलै, जबकि विपक्षी सीनेटर सिनी न॑ ई वोटिंग केरऽ बहिष्कार करलकै ।

एकरऽ मतलब ई होलै कि कैटेलोनिया न॑ स्पेन केरऽ संविधान क॑ ख़ारिज करी देन॑ छै ।

बार्सिलोना में प्रांतीय सीनेट केरऽ इमारत के बाहर अलगाववादी समर्थक न॑ ई फैसला प॑ झंडा लहराय क॑ खुशी के इज़हार करलकै ।

ई संकट तब॑ शुरू होलै जब॑ ई महीना के शुरुआत में कैटेलोनिया न॑ आज़ादी केरऽ मुद्दा पर जनमतसंग्रह करवैलकै ।

कैटेलोनिया के सरकार न॑ बतैलकै कि ई जनमतसंग्रह में ४३ प्रतिशत मतदाता न॑ वोट करलकै, जेकरा म॑ ९० प्रतिशत लोगें आज़ादी के पक्ष में अपनऽ मत देलकै । लेकिन स्पेन केरऽ संवैधानिक अदालत न॑ ई जनमतसंग्रह क॑ अवैध क़रार देल॑ छेलै ।

कैटेलोनिया में स्पेन केरऽ करीब १६ फीसद आबादी रहै छै । कैटेलोनिया स्पेन केरऽ पूर्वोत्तर के इलाका छेकै। स्पेन केरऽ आर्थिक क्षमता में कैटेलोनिया केरऽ हिस्सा २० फीसद छै ।