कैंसर केरऽ इलाज लेली मुंबई गेला प॑ निवेश आयुक्त करतै व्यवस्था , किडनी आरू लीवर के इलाजलेली नै जाय ल॑ होतै बाहर | News in Angika

पटना : बिहार केरऽ मुख्यमंत्री नीतीश कुमार न॑ कहल॑ छै कि राज्य म॑ स्वास्थ्य केरऽ क्षेत्र म॑ अब॑ दोसरऽ चरण के सुधार शुरू करलऽ जाय रहलऽ छै ।जेकरऽ  तहत सबस॑ बड़ऽ चुनौती मरीजऽ क॑ इलाज लेली मजबूरी म॑ बाहर जाय स॑ रोकै के होतै । जबकि  बिहार केरऽ उपमुख्यमंत्री सुशील कुमार मोदी बोलल॑ छै कि कैंसर केरऽ इलाज लेली मुंबई गेलै प॑ निवेश आयुक्त  व्यवस्था करतै ।

बिहार केरऽ सब्भे सरकारी अस्पतालऽ म॑ दवा, उपकरण, डॉक्टर स॑ ल करी क॑ तमाम आधारभूत संरचना व सुविधा केरऽ विकास पर खासतौर स॑ ध्यान देलऽ जाय रहलऽ छै ।

कैंसर केरऽ इलाज लेली पटना व मुजफ्फरपुर के  अलावा किडनी के इलाज लेली आइजीआइएमसी आरू पीएमसीएच म॑ व्यवस्था करलऽ गेलऽ छै । आबै वाला दिनऽ म॑ लीवर समेत अन्य गंभीर बीमारियऽ के इलाज लेली भी व्यवस्था करलऽ जैतै ।

मुख्यमंत्री मंगलवार क॑ मुख्यमंत्री सचिवालय स्थित संवाद कक्ष म॑ स्वास्थ्य विभाग केरऽ ८६६ करोड़ रुपये के ११३ योजना के उद्घाटन आरू शिलान्यास करला के बाद समारोह क॑ संबोधित करी रहलऽ छेलै ।

मुख्यमंत्री न॑ कहलकै कि पीएमसीएच क॑ अंतरराष्ट्रीय स्तर के अस्पताल बनैलऽ जैतै । एकरा म॑ जगह  के कोय कमी छै । जरूरत पड़ला प॑ पुरानऽ संरचना के स्थान पर नयऽ  आधारभूत संरचना बनवैलऽ जैतै ।

बिहार केरऽ उपमुख्यमंत्री सुशाल कुमार मोदी बोललकै कि कैंसर केरऽ इलाज लेली मुंबई गेलै प॑ निवेश आयुक्त  व्यवस्था करतै ।

डिप्टी सीएम सुशील कुमार मोदी न॑ कहलकै कि स्वास्थ्य विभाग केरऽ कार्यक्रम म॑ बिहार स॑ कैंसर केरऽ इलाज कराबै लेली मुंबई जाय वाला के संख्या काफी ज्यादा छै । ई लोगऽ क॑ मुंबई म॑ हर तरह के सहायता मुहैया कराबै लेली वहां मौजूद निवेश आयुक्त क॑ एकरा लेली अधिकृत करलऽ गेलऽ छै ।

हुनी ई भी कहलकै कि  सब जिला अस्पतालऽ म॑ किडनी केरऽ डायलिसिस के व्यवस्था करलऽ जाय रहलऽ छै । ई बीपीएल वर्ग लेली मुफ्त होतै ।हुनी कहलकै कि जे डॉक्टर दुर्गम क्षेत्र म॑ काम करै छै, हुनका २५ हजार रुपया अतिरिक्त भत्ता देलऽ जैतै ।

१५ अक्तूबर तलक सब्भे स्वास्थ्य केंद्र आरू अस्पतालऽ म॑ आयरन, फोलिक एसिड आरू विटामिन डी के दवा मिलना शुरू होय जैतै ।