अलग-अलग नजरिया स॑ आतंकवाद क॑ देखना बंद करलऽ जाय : सुषमा स्वराज

 न्यूयार्क: भारतीय विदेश मंत्री सुषमा स्वराज न॑ दुनिया केरऽ देशऽ स॑ आहवान करल॑ छै कि आतंकवाद क॑ अलग-अलग नजरिया स॑ देखना बंद करलऽ जाय । संयुक्त राष्ट्र महासभा म॑ संबोधित करत॑ हुअ॑ भारत केरऽ विदेश मंत्री सुषमा स्वराज न॑ आतंकवाद क॑ ल॑ क॑ पाकिस्तान प॑ प्रहार करत॑ कहलकै कि आजकऽ विश्व अनेक मुश्‍क‍िलऽ स॑ ग्रस्त छै । आतंकवाद, गरीबी, भूखमरी, समुद्री रास्ता प॑ खतरा स॑ दुनिया जूझी रहलऽ छै । बेरोजगारी स॑ युवा निराश होय रहलऽ छै । साइबर सुरक्षा पर भी संकट गहराय रहलऽ छै । हुनी कहलकै कि संयुक्त राष्ट्र महासभा म॑ बर्ष २०१५ म॑ बर्ष २०३० केरऽ विश्व लेली कुछ मसौदा तैयार करलऽ गेलऽ छेलै । अपना सब क॑ यथास्थ‍िति स॑ बाहर निकलै ल॑ होतै आरू योजना केरऽ कार्यान्वयन मट तेजी लानै ल॑ होतै ।

भारतीय विदेश मंत्री सुषमा स्वराज न॑ कहलकै कि हम्म॑ सब गरीबी स॑ लड़ी रहलऽ छियै, पर पाकिस्तान हमरा स॑ लड़ी रहलऽ छै । भारत न॑ पाकिस्तान द्वारा आतंकवादी कोशि‍शऽ के बावजूद अपनऽ विकास केरऽ रफ्तार कम नै हुअ॑ देलकै । हुनी कहलकै कि बेगुनाह सब केरऽ खून बहाबै वाला पाकिस्तान हमरा सबक॑ मानवाधिकार केरऽ पाठ पढ़ाय रहलऽ छै । सुषमा न॑ पाकिस्तान क॑ जवाब देलकै कि जब॑ पाकिस्तान केरऽ प्रधानमंत्री शाहिद खाकान अब्बासी न॑ परसो भारत प॑ ओकरऽ देश के खिलाफ आतंकवादी गतिविधियऽ मे॑ लिप्त होय के आरोप लगैल॑ छेलै, तब॑ सुनै वाला बोली रहलऽ छेलै कि देखऽ के बोली रहलऽ छै । जे मुल्क खुद आतंक क॑ पनाह दै छै वही हमरा सब क॑ मानवधिकार के पाठ पढ़ाय रहलऽ छै ।

सुषमा न॑ कहलकै कि मोहम्मद अली जिन्नाह न॑ की कहलकै पता नै, ई त॑ इतिहास के बात छै पर पीएम मोदी न॑ आजकऽ दौर म॑ शांति केरऽ संदेश देलकै । मोदी न॑ दोस्ती केरऽ हाथ बढ़ैलकै । लेकिन शांति क॑ के बदरंग करलकै, ई दुनिया जानै छै । कॉम्प्रे‍हेंसिव बाइलेट्रल डॉयलॉग म॑ बाइलेट्रल शब्द जानी बूझी क॑ डाललऽ गेलै । कश्मीर भारत आरू पाकिस्तान केरऽ द्विपक्षीय मुद्दा छेकै । कोय भी तेसरऽ क॑ एकरा म॑ दखल नै दै ल॑ देलऽ जैतै ।

भारतीय विदेश मंत्री सुषमा स्वराज न॑ कहलकै कि जहां भारत न॑ एम्स, आईआईटी, आईआईएम बनैलकै, वहीं पाकिस्तान न॑ अपनऽ यहां हिजबुल मुजाहिद्दीन, लश्कर ऐ तैयबा जैसनऽ आतंकवादी संगठन स्थापित करलकै । भारत न॑ डॉक्टर, इंजीनियर पैदा करलकै आरू पाकिस्तान न॑ दहशतगर्द आरू जेहादी पैदा करलकै ।

भारतीय विदेश मंत्री न॑ कहलकै कि सिर्फ भारत ही नै अफ़ग़ानिस्तान, बांग्लादेश भी पाकिस्तान केरऽ वजह स॑ आतंकवाद स॑ जूझी रहलऽ छै । ई लेली यूएन म॑ पहलऽ बार ऐसनऽ होलऽ छै कि पाकिस्तान केरऽ भाषण के बाद तीन-तीन देशऽ क॑ जवाब दै ल॑ परलऽ छै ।