अंग आरू अंगवासी केरॊ प्रगति आरू उन्नति लेली गौतम सुमन लगातार नवाँ दफा रमजान मॆं लॆ रहलॊ छै हिस्सा

अमरपुर (भागलपुर) : पूरे देश मॆं जहाँ एक तरफ योग विवादास्पद विषय बनी रहलॊ छै आरू इ बात पर चर्चा छिड़ी गेलॊ छै कि जबॆ मुस्लिम योग करॆ सकै छै तॆ एगॊ हिन्दू नमाज कैन्हॆ नै. ऐन्हॊ मॆ सौसे अंग देश केरॊ चहेता बनी चुकलॊ गौतम सुमन नॆ एगॊ अनूठा मिशाल पेश करनॆ छै. अंग उत्थानान्दोलन समिति, बिहार-झारखंड केरॊ केन्द्रीय अध्यक्ष, गौतम सुमन आज सॆं प्रारंभ होय कॆ महीना भर चलै वाला पर्व रमजान मॆं हिस्सा लॆ रहलॊ छै.


सर्वाधिक प्रेरणादायक बात इ छेकै कि हिन्दू समुदाय केरॊ श्री गौतम सुमन लेली इ नवाँ मौका छेकै जबॆ हुनी मुस्लिम समुदाय केरॊ पवित्र पर्व रमजान मॆं हिस्सा लॆ रहलॊ छै.

श्री गौतम सुमन अंग महाजनपद केरॊ समृद्धि आरू अंगवासी केरॊ प्रगति आरू उन्नति के कामना लेली आज सॆं प्रारंभ होय रहलॊ रमजान मॆं हिस्सा लेतॆं आपनॊ पैतृक आवास अमरपुर मॆं रोजा रखना आरंभ करलकै.

उल्लेखनीय बात इ छेकै कि श्री गौतम सुमन अंग महाजनपद केरॊ समृद्धि आरू अंगवासी केरॊ प्रगति आरू उन्नति लेली रमजान मॆं हिस्सा लॆ कॆ रोजा रखी रहलॊ छै. इ एगॊ सराहनीय कदम छेकै. जरूरत इ बात केरॊ छै कि अपना सीनी भी हिनका सॆं प्रेरणा लॆ कॆ कलॆ-कलॆ धर्मनिरपेक्षता केरॊ ऐन्हॊ आयोजन मॆ शरीक करौं. भारत केरॊ धर्मनिरपेक्ष माहौल मॆं अलग-अलग समुदाय के मध्य पारस्परिक सौहार्द केरॊ वातावरण बनैलॊ राखै के दिशा मॆं इ एगॊ महत्वपूर्ण आरू बड़ियॊ कदम छेकै.