बिहुला-बिषहरी पूजा विधि-विधान सँ होलै पूरा | News in Angika

भागलपुर, 20,अगस्त,2020 । अंगदेश केरौ सबसँ बड़ौ लोक आस्था के परब, बिहुला-बिषहरी पूजा विधि-विधान सँ काल मंगलवार क पूरा होय गेलै । 

मंदिर मँ स्थापित कलश आरू रंग-बिरंगो मंजूषा केरौ विसर्जन मंदिरौ के भगत सिनी नँ शहर केरौ घाटौ प करलकै ।

कोरोना के चलतें ई बार मंदिर सिनी मँ माय बिषहरी के मूर्ति केरौ स्थापना नै करलौ गेलौ रहै, ई लेली बिषहरी पूजा के समापन प विसर्जन शोभा यात्रा नै निकाललौ गेलै ।

एकरो पहिनै सोमवार साँझैं सँ देर रात तलक बाला लखेन्द्र केरौ सांकेतिक बारात निकाललो गेलै । देर रात   बाला लखेन्द्र आरू बिहुला के बीहा संपन्न होलै । 

गंगानदी के अलावा चंपानदी मँ भी कलश क विसर्जित करलौ गेलै ।

ई मौका प मंजूषा चित्रकला प्रतियोगिता आरू  मंजूषा प सेमिनार केरौ आयोजन भी करलौ गेलै ।

बिषहरी पूजा केंद्रीय समिति नँ सादगी पूर्वक आऱू शांतिपूर्वक बिषहरी पूजा मनाबै ल भक्तौ सिनी  क साधुवाद देलै छै ।