अंग गौरव शहीद निलेश कुमार नयन शौर्य चक्र (मरणोपरांत) स॑ सम्मानित | News in Angika

नई दिल्ली । अंग देश गौरव वायु सेना केरऽ शहीद निलेश कुमार नयन क॑ शौर्य चक्र (मरणोपरांत) स॑ सम्मानित करलऽ गेलऽ छै । हुनका ई सम्मान नैसर्गिक  साहस के साथ वीरता केरऽ प्रदर्शन करी क॑ आतंकवादियऽ स॑ लड़ी करी क॑ देश केरऽ रक्षा लेली  बलिदान व सर्वस्व न्योछावर करै लेली प्रदान करलऽ गेलै । ज्ञातव्य छै कि निलेश कुमार नयन भारतीय वायुसेना केरऽ गरूड़ कंमाडों दल म॑ कारपोरल के पद प॑ तैनात छेलै । ११ अक्टूबर २०१७ क॑ जम्मू-कश्मीर केरऽ बांदीपुरा क्षेत्र म॑ आतंकवादी सें मुठभेड़ म॑ हुनी शहीद होय गेलऽ छेलै ।

कल २६ जनवरी क॑ गणतंत्र दिवस के अवसर प॑ भारत सरकार न॑ कुल ३१३ रक्षा कर्मियऽ क॑ वीरता आरू प्रतिष्ठित पुरस्कार सब प्रदान करलकै । वायु सेना गरूढ़ कमांडो ज्योति प्रकाश निराला क॑ अशोक चक्र (मरणोपरांत), थल सेना मेजर विष्ठ क॑ कीर्ति चक्र प्रदान करलऽ गेलै । जबकि आतंकवादी सिनी के खिलाफ लड़ाय में सर्वोच्च बलिदान दै वास्त॑ सर्जेंट मिलिंद किशोर खैरनार आरू कारपोरल निलेश कुमार नयन क॑ शौर्य चक्र (मरणोपरांत) स॑ सम्मानित करलऽ गेलऽ छै ।

अभी हाल ही म॑ गत १७ जनवरी क॑ शहीद निलेश केरऽ गाँव म॑ बिहार केरऽ मुख्यमंत्री नीतीश कुमार केरऽ दौरा होलऽ छेलै।  मुख्यमंत्री न॑ शहीद निलेश कुमार नयन केरऽ उधाडीह, सुलतानगंज, भागलपुर स्थित घऽर जाय क॑ हुनकऽ चित्र प॑ अपनऽ श्रद्धा सुमन अर्पित करल॑ छेलै । साथ ही हुनकऽ माता श्रीमती बुलबुल देवी आरू पिता श्री तरूण कुमार सिंह आरू परिवारजनऽ सें मिली क॑ सान्त्वना देल॑ छेलै । शहीद केरऽ परिजन क॑ मुख्यमंत्री तरफऽ सें आश्वासन देलऽ गेलऽ छेलै कि राज्य सरकार तरफऽ सें हर संभव सहायता प्रदान करलऽ जैतै ।