यू.पी.म॑ वास्कोडिगामा - पटना सुपरफास्ट भेलै बेपटरी, यात्री केरऽ मौत आरू घायल होय केअंदेशा | News in Angika

चित्रकुट । ट्रेन केरऽ बेपटरी होय क॑ दुर्घटना होय जाना अब॑ आम बात होय गेलऽ छै ! यात्रा केरऽ सबसें सुरक्षित मानलऽ जाय वाला साधन अब॑ खतरनाक बनलऽ जाय रहलऽ छै । आय यू.पी.म॑ वास्कोडिगामा - पटना सुपरफास्ट बेपटरी होय गेलै । तीन यात्री केरऽ मौत होय गेलऽ छै आरू नौ घायल होय गेलऽ छै ।

ट्रेन केरऽ बेपटरी होय के कारण रेलवे ट्रैक केरऽ टूटलऽ होना बतैलऽ जाय रहलऽ छै। जोन घड़ी हादसा होलै, ट्रेन करीब सौ किमी. प्रति घंटा केरऽ रफ्तार सें जंक्शन केरऽ दू नंबर प्लेटफार्म सें गुजरी रहलऽ छेलै । ई सुपरफास्ट ट्रेन केरऽ मानिकपुर जंक्शन में ठहराव नै रहै छै ।

वास्कोडिगामा-पटना सुपरफास्ट ट्रेन शुक्रवार तड़के सवा चार बजे पाठा केरऽ घनऽ जंगल के बीच सन्नाटा क॑ चीरतें जेन्हैं मानिकपुर जंक्शन में दाखिल होलै, ओकरऽ १३ बोगी पटरी सें उतरी गेलै । रेलवे ट्रैक उखड़ी क॑ प्लेटफार्म प॑ जाय क॑ गिरी गेलै आरू बोगी प्लेटफार्म क॑ तोड़तें ओकरा में फँसी क॑ रही गेलै । ट्रेन केरऽ दू कोच बुरी तरह क्षतिग्रस्त होय गेलै । हादसा होथैं यात्रियऽ में चीख-पुकार मची गेलै । सब्भे घायलऽ के सामुदायिक स्वास्थ्य केंद्र मानिकपुर आरू जिला चिकित्सालय में भर्ती करैलऽ गेलऽ छै ।