अंतर्राष्ट्रीय राजगीर महोत्सव केरऽ राज्य स्तरीय कवि सम्मेलन में होतै हिंदी, उर्दू ,अंगिका, बज्जिका, भोजपुरी, मैथिली, मगही के कवि सब के समागम | News in angika

राजगीर / पटना। आगामी २५ सें २७ नवंबर तक तीन दिवसीय अंतर्राष्ट्रीय राजगीर महोत्सव मनैलऽ जैतै । अंतर्राष्ट्रीय राजगीर महोत्सव केरऽ राज्य स्तरीय कवि सम्मेलन में हिंदी,अंगिका,बज्जिका,भोजपुरी,मैथिली,मगही,उर्दू के कवि सब के समागम होतै । ई महोत्सव में आबै वाला पर्यटकऽ सब क॑ स्थानीय विरासत व आधुनिकता के झलक देखै ल॑ मिलतै ।

अतने नै महोत्सव में बिहार केरऽ लोक कला व संस्कृति केरऽ समागम क॑ देखै के मौका पर्यटकऽ सब क॑ मिलतै । पूर्व सें चललऽ आबी रहलऽ परंपरागत ग्राम श्रीमेला, कृषि मेला, दंगल, तांगा सज्जा,तांगा दौड़ प्रतियोगिता केरऽ आयोजन पूर्व सें भी बेहतर तरीका सें आयोजित करलऽ जैतै । एकरऽ अलावे ई वर्ष महोत्सव क॑ यादगार बनाबै लेली कुछ नया आयाम भी जोड़लऽ जैतै । ई बार भी महोत्सव के मुख्य आकर्षण आधुनिक एवं ज्ञानव‌र्द्धक पुस्तकऽ के मेला आरू सांस्कृतिक कार्यक्रम रहतै । महोत्सव में जे सांस्कृतिक कार्यक्रम आयोजित करलऽ जैतै,ओय में देश के ख्याति प्राप्त कलाकार भी कार्यक्रम में शिरकत करतै ।

राजगीर महोत्सव सें संबद्ध प्रभारी बिहार पर्यटन विभाग केरऽ डॉ. सुश्री माला प्रसाद न॑ कल अंगिका.कॉम केरऽ कुंदन अमिताभ क॑ बतैलकै कि ई महोत्सव लेली कलाकार सब केरऽ चयन करी लेलऽ गेलऽ छै । हुनी बतैलकै कि अंगिका केरऽ कवि क॑ भी एकरा में शामिल करलऽ जैतै ।