पालोजोरी में सिखैलऽ गेलै उन्नत खेती आरू जैविक खेती के गुर | News in Angika

पालोजोरी,गोड्डा : अन्तरराष्ट्रीय स्वयंसेवी संस्था वीएसओ केरऽ वॉलेंटियर आरू नीड्स केरऽ प्रतिनिधि सिनी न॑ पालोजोरी प्रखंड सह अंचल कार्यालय के पास एगो कार्यक्रम के माध्यम सें क्षेत्र केरऽ लोगऽ क॑ जैविक खेती लेली प्रेरित करलकै ।



ई दौरान वीएसओ यूके आरू इंडिया केरऽ प्रतिनिधि सब न॑ नाटक के माध्यम सें रासायनिक खेती सें होय वाला नुकसान के साथ-साथ जैविक खेती सें होय वाला फायदा सब क॑ बतैलकै । नाटक के माध्यम सें ई भी बतैलऽ गेलै कि जैविक खेती केना आबै वाला दिन में लोगऽ लेली जरूरी होतै ।

ई भी बतैलऽ गेलै कि आबै वाला दिनऽ में लोगऽ क॑ जैविक खेती दन्न॑ लौटै ल॑ परतै । बतैलऽ गेलै कि जैविक खेती के माध्यम सें किसान कम मेहतन व लागत में ही बेहतर मुनाफा कमाब॑ सकै छै । ई भी कहलऽ गेलै कि जैविक खेती में प्राकृतिक संसाधनऽ के उपयोग करी क॑ खेती करलऽ जाय छै । वहीं कार्यक्रम केरऽ उद्घाटन करतें अंचलाधिकारी पंकज कुमार न॑ भी उपस्थित लोगऽ क॑ ऑर्गेनिक खेती के बारे में विस्तार सें जानकारी देलकै ।

वीएसओ यूके केरऽ प्रतिनिधि सब भारत केरऽ प्रतिनिधि सथें मिली क॑ भुरकुंडी व रघुवाडीह पंचायत में जैविक खेती करी रहलऽ छै । ई कार्यक्रम केरऽ माध्यम सें टूटलऽ-फूटलऽ हिंदी में वीएसओ यूके के स्वयंसेवी निकॉल, केटी, साराह, हॉली आदि न॑ अपनऽ अनुभव लोगऽ सब क॑ सुनैत॑ कहलकै कि हुनी सब यहांकरऽ लोगऽ सें कुछ सीखै व सिखाबै ल॑ ऐलऽ छै ।