गंगा नहाय क॑ घर लौटी रहलऽ ४ महिला केरऽ ट्रेन के चपेट में ऐला सें मौत |News in Angika

धरहरा: गंगा नहाय क॑ घर लौटी रहलऽ ४ महिला केरऽ ट्रेन के चपेट में ऐला सें मौत होय गेलऽ छै । मुंगेर जिला केरऽ धरहरा थाना क्षेत्र केरऽ अदलपुर हाल्ट के पास आय भोरे भागलपुर—दानापुर इंटरसिटी एक्सप्रेस ट्रेन के चपेट में आबी क॑ चार महिला के मौत होय गेलै । एक अन्य महिला घायल बतैलऽ जाय रहलऽ छै ।

पुलिस अधीक्षक केरऽ अनुसार मरै वाला महिला सब के तत्काल पहचान नै हुअ॑ सकलऽ छै । घायल महिला क॑ इलाज लेली मुंगेर सदर अस्पाताल भेजलऽ गेलऽ छै । बतलैलऽ गेलऽ छै कि ई हादसा सें आक्रोशित स्थानीय लोगऽ न॑ उक्त ट्रेन कट रोकी रखन॑ छै ।

पुलिस घटनास्थल पर पहुंची गेलऽ छै । ग्रामीणऽ सिनी क॑ समझाय-बुझाय क॑ शवऽ क॑ पटरी स॑ हटाय क॑ ट्रेन क॑ गंतव्य लेली रवाना करै के प्रयास जारी छै । ई हादसा वू समय होलै जब॑ ई महिला सब गंगा स्नान करी क॑ अपनऽ घऽर लौटी रहलऽ छेलै । आशंका छै कि पटरी पार करै घड़ीं कुहासा के कारण ओकरा सब क॑ ट्रेन नै दिखलऽ होतै आरू वू हादसा के शिकार होय गेलै ।