बाल विवाह आरू दहेज प्रथा के खिलाफ एकजुट होय क॑ मेटाबै के नीतिश कुमार के आहवान | News in Angika

पटना । आय बिहार केरऽ मुख्य मंत्री केरऽ हाथ स॑ बाल-विवाह आरू दहेज प्रथा के खिलाफ सशक्त राज्यव्यापी महाअभियान के आगाज होलै । गाँधी जयंती प॑ ई अभियान क॑ शुभारंभ मुख्यमंत्री नीतीश कुमार पटना स्थित सम्राट अशोक कन्वेंशन सेंटर केरऽ बापू सभागार म॑ करलकै ।

बिहार केरऽ मुख्यमंत्री नीतीश कुमार न॑ आय गांधी जयंती केरऽ अवसर प॑ कहलकै कि जेना बिहार न॑ शराबबंदी लेली शपथ ल॑ करी क॑ एकरा सफल बनैलकै, वेन्हैं बाल विवाह आरू दहेज प्रथा के खिलाफ भी एकजुट होय क॑ ई सब कुरीति क॑ समाज स॑ मेटाना छै ।

बापू सभागार म॑ बाल विवाह आरू दहेज उन्मूलन अभियान के शुभारंभ कार्यक्रम के उद्घाटन करत॑ नीतिश कुमार

हुनी कहलकै कि अब॑ बिहार म॑ नै त॑ कोय बेटी जलतै आरू नै ही बाल विवाह होतै । मुख्यमंत्री नीतीश कुमार न॑ कहलकै कि २१ जनवरी क॑ बाल विवाह, दहेज प्रथा आरू शराब सेवन के खिलाफ मानव श्रृंखला बनैलऽ जैतै ।

ई मौका प॑ मुख्यमंत्री बाल-विवाह आरू दहेज उन्मूलन लेली जागरूकता रथ आरू कला जत्था क॑ झंडी दिखैलकै । ई दूनू जत्था पूरा राज्य के भ्रमण करी क॑ लोगऽ क॑ दहेज आरू बाल विवाह केरऽ कुप्रभावऽ के प्रति लोगऽ क॑ जागरुक करतै ।

बापू सभागार म॑ बाल विवाह आरू दहेज उन्मूलन अभियान के शुभारंभ कार्यक्रम म॑ संबोधित करत॑ नीतिश कुमार

शराबबंदी के बाद समाज सुधार के दिशा म॑ बढ़ैलऽ गेलऽ राज्य सरकार केरऽ ई बड़ऽ कदम छेकै । बिहार केरऽ बाल-विवाह आरू दहेज स॑ मुक्त राज्य बनाबै के संकल्प के साथ ई अभियान के शुरुआत राज्य सरकार करी रहलऽ छै ।