सुलतानगंज के लगीच करहरिया आरू गनगनियां म॑ आयोजित होतै भव्य अंगिका कवि सम्मेलन | News in Angika

सुलतानगंज । आबै वाला अगला कुछ दिना के अंतराल प॑ 'कविता चली गाँव की ओर' कार्यक्रम के तहत सुलतानगंज के लगीच स्थित करहरिया आरू गनगनियां म॑ अंगिका कवि गोष्ठी आयोजित करलऽ जैतै ।

अंगिका केरऽ कवि सुधीर कुमार प्रोग्रामर के अनुसार "कविता चली गाँव की ओर" कार्यक्रम के तहत दिनांक २८ अक्टूबर २०१७, शनिवार क॑ उच्च विद्यालय, करहरिया, केरऽ मैदान म॑ रात्रि ८ बजे स॑ भव्य कवि सम्मलेन के आयोजन म॑ पटना, भागलपुर, बाँका, खगड़िया, बेगूसराय, मुंगेर, कटिहार आरनी के वरीय कवि के आगमन होय रहलऽ छै। सर्वकल्याणी छठ पूजा समिति, करहरिया, सुलतानगंज, भागलपुर द्वारा आयोजित ई प्रांतीय काव्योत्सव म॑ अंगिका केरऽ १८ कवि  भाग लेतै । कार्यक्रम केरऽ आयोजन-अध्यक्ष संजीव कुमार सिंह छेकै ।

फेरु ३ दिसंबर २०१७ क॑ मध्य विद्यालय गनगनियां, सुल्तानगंज, भागलपुर के प्रांगन म॑ अखिल भारतीय अंगिका साहित्य कला मंच सहित आरू कई मंच के साहित्यकार आरो कला जत्था के साथ विशाल कवि सम्मलेन के आयोजन तय छै । जेकरा म॑ १०० अंगिका कवि, साहित्यकार केरऽ भाग लै के संभावना छै । अंगिका केरऽ साहित्यकार साथी सुरेश सूर्य, सुधीर कुमार प्रोग्रामर, हीरा प्रसाद हरेन्द्र, भवानंद सिह प्रशांत आरनी साहित्यकार, कवि, कलाकार स॑ सहमति ल॑ क॑ कार्यक्रम केरऽ तैयारी करी रहलऽ छै।