अंगिका भाषा क॑ संविधान के आठमऽ अनुसूची म॑ शामिल कराबै वास्तें प्रारंभ भेलै हस्ताक्षरअभियान | News in Angika

भागलपुर । दुनिया केरऽ प्राचीनतम भाषा म॑ एक अंगिका क॑ भारतीय संविधान केरऽ आठमऽ अनुसूची म॑ शामिल करै के माँग क॑ ल॑ करी क॑ अंग उत्थानान्दोलन समिति,बिहार-झारखंड के बैनर तले आय अंग महाजनपद के हृदय स्थल भागलपुर केरऽ अलीगंज चौक स॑ हस्ताक्षर अभियान के आरंभ करी देलऽ गेलऽ छै ।

ई हस्ताक्षर अभियान लगातार ३१ दिसम्बर तलक चलतै । ई बाबत समिति अध्यक्ष गौतम सुमन न॑ बतैलकै कि बिहार-झारखंड केरऽ २१ अंग जनपद सहित दुनिया केरऽ हर प्रांत व जिला म॑ रही रहलऽ अंगिका भाषियऽ के संख्यां लगभग ९ करोड़ छै ।

बिहार आरू झारखंड सरकार न॑ अंगिका भाषा क॑ मान्यता देल॑ छै । बिहार सरकार न॑ जहाँ अंगिका अकादमी केरऽ गठन करी  क॑ अंगिका भाषा क॑ समुचित सम्मान व अधिकार दै लेली बचनबद्ध छै । वहीं झारखंड सरकार न॑ लोक सेवा आयोग आरू कर्मचारी चयन आयोग केरऽ परीक्षा म॑ अंगिका भाषा क॑ शामिल करी क॑ अंगिका भाषा क॑ मान्यता दै केरऽ काम करन॑ छै । तिलकामाँझी भागलपुर विश्व विद्यालय म॑ एमए केरऽ पाठ्यक्रमऽ म॑ अंगिका भाषा बरसों स॑  शामिल छै ।

अंगिका भाषा केरऽ गौरवशाली इतिहास व भूगोल के साथ-साथ एकरऽ अपनऽ व्याकरण व लिपि भी छै । अंगिका भाषा म॑ वृहद पैमाना प॑ साहित्य के सृजन होलऽ छै आरू अभी भी होय रहलऽ छै । आकाशवाणी व दूरर्दशन चैनल स॑ भी अंगिका भाषा म॑ कार्यक्रम प्रस्तुत करलऽ जाय छै । अंगिका भाषा म॑ कई फीचर फिल्म व डाॅक्यूमेंट्री बनी चुकलऽ छै ।

संविधान केरऽ आठमऽ अनुसूची म॑ अंगिका भाषा क॑ शामिल कराबै क॑ ल॑ करी क॑ कई बार संसद में अंग क्षेत्र केरऽ नेतागण सरफऽ स॑ गूँज भी उठलऽ छै । हुनी कहलकै कि संविधान केरऽ आठमऽ अनुसूची म॑ दर्ज होय के सब्भे शर्तों व मानक प॑ खड़ा उतरै छै । एकरऽ  बावजूद विश्व केरऽ ई प्राचीन अंगिका भाषा क॑ एकरऽ वाजिब सम्मान व अधिकार स॑ उपेक्षित रखना करोड़ों अंगिकाभाषा भाषी केरऽ उपेक्षा छेकै ।

आगू केरऽ रणनीति के खुलासा करतें हुअ॑ अंग उत्थानान्दोलन समिति,बिहार-झारखंड केरऽ राष्ट्रीय अध्यक्ष गौतम सुमन न॑ बतैलकै कि ३ जनवरी २०१८ स॑ अंग महाजनपद केरऽ जिला व प्रखंड मुख्यालयऽ म॑ धरना-प्रदर्शन करलऽ जैतै । ओकरऽ बाद फिर २५ जनवरी स॑ स्कूल व काॅलेजऽ म॑ छात्र-छात्रा सब के बीच क्वीज प्रतियोगिता के माध्यम स॑ हुनका  जागरूक करी क॑ ५ जुलाई २०१८ क॑ राष्ट्रीय राजधानी क्षेत्र दिल्ली केरऽ जन्तर-मन्तर प॑ धरना सह अनशन करी क॑ हस्ताक्षर युक्त ज्ञापन समर्थकऽ सिनी के साथ जाय क॑  प्रधानमंत्री व गृहमंत्री महोदय क॑ सौंपी क॑ अपनऽ अस्मिता के हक-हकूक केरऽ क्रांति के शंखनाद करलऽ जैतै ।

आज भोरे ८ बजे स॑ शुरू करलऽ गेलऽ ई हस्ताक्षर अभियान के समापन ११ बजे करलऽ गेलै । ई तीन घंटा म॑ २४२ लोगऽ न॑ हस्ताक्षर करी क॑ समिति केरऽ माँग क॑ जायज बतलाय क॑ अपनऽ सहमति प्रदान करलकै ।

ई मौका प॑ जगदीश यादव,सुनील सिंह,ज्ञानी चौधरी,प्रीतम विश्वकर्मा,ध्रुव साहा,विनय गुप्ता,पार्षद सरजुग साह,गणेश भगत,रमण रजक,योगेश गुप्ता,परशुराम पोद्दार,धीरज पंडित,बाबा मनमौजी कर्ण अंगपुरी,योगेन्द्र पाल आदि उपस्थित रहै ।