प्रधानमंत्री केरऽ जन्म दिवस प॑ अंगिका भाषा क॑ आठमऽ अनुसूची म॑ शामिल करै लेली सौंपलऽगेलै माँग-पत्र | News in Angika

सुलतानगंज : अखिल भारतीय अंगिका कला मंच, भागलपुर तरफऽ स॑ केंद्रीय राज्य मंत्री क॑ माँग पत्र सौंपी क॑ अंगिका भाषा क॑ आठमऽ अनुसूची म॑ शामिल करै के माँग करलऽ गेलऽ छै । कल भारत सरकार केरऽ माननीय स्वास्थ्य व परिवार कल्याण राज्य मंत्री श्री अश्विनी कुमार चौबे जी क॑ पटना स॑ भागलपुर जाय के क्रम म॑ सुल्तानगंज केरऽ कृष्णगढ़ मोड़ प॑ दर्जनऽ अंगिका भाषा-भाषी ई विषय संबंधी चार पेज केरऽ मांग पत्र सौंपलकै । श्री चौबे न॑ एकरा लेली अथक प्रयास करै के भरोसा भी देलकै ।

माननीय स्वास्थ्य व परिवार कल्याण राज्य मंत्री श्री अश्विनी कुमार चौबे जी क॑ अखिल भारतीय अंगिका कला मंच केरऽ तरफऽ स॑ सौंपलऽ गेलऽ माँग पत्र

अखिल भारतीय अंगिका कला मंच, बिहार केरऽ प्रदेश महासचिव, श्री सुधीर प्रोग्रामर न॑ स्वास्थ्य व परिवार कल्याण राज्य मंत्री श्री अश्विनी कुमार चौबे जी क॑ केंद्र म॑ राज्य मंत्री केरऽ पद प॑ आसीन होय लेली अभनंदन, बधाई व शुभकामना देल॑ छै । माँग पत्र म॑ हुनका याद दिलैलऽ गेलऽ छै कि हुनी खुद अपनऽ मातृभाषा अंगिका केरऽ विकास आरू एकरा संविधान केरऽ अष्टम अनुसूची म॑ शामिल कराबै वास्त॑ संकल्प ल॑ क॑ आदरणीय चकोर जी सथं॑ बरसों स॑ प्रयासरत छियै ।

माँग पत्र म॑ ई भी कहलऽ गेलऽ छै कि हुनी अंगजनपद आरू अंगिका केरऽ प्रतिनिधित्व करै वाला भारत सरकार म॑ पहलऽ दमदार, संकल्पित आरू वचनबद्ध व्यक्तित्व छै । ई भी कहलऽ गेलऽ छै कि संयोग स॑ देश आरू प्रदेश म॑ एक ही मंतव्य वाला पार्टी के सरकार छै । अंगिका भाषा क॑ आठमऽ अनुसूची म॑ शामिल कराबै लेली एकदम उपयुक्त वातावरण  मौजूद छै ।

अखिल भारतीय अंगिका कला मंच केरऽ माँग पत्र म॑ कहलऽ गेलऽ छै कि पाँच करोड़ अंगिका भाषी केरऽ माँग क॑ जायज मानत॑ हुअ॑ ही २३ जून, २०१५ क॑ बिहार अंगिका अकादमी केरऽ गठन करलकै ।  ई लेली कला-मंच, हिंदुस्तान केरऽ प्रभावशाली माननीय प्रधानमंत्री श्री नरेंद्र मोदी जी केरऽ जन्म दिन केरऽ पावन अवसर प॑ श्री अश्विनी कुमार चौबे जी के माध्यम स॑ केंद्र सरकार स॑ निवेदन करल॑ छै कि अंगिका क॑ अष्टम सूची म॑ याथाशीघ्र शामिल करलऽ जाय ।

माँग-पत्र के साथ-साथ अंगिका भाषा-भाषी जिला, अंगिका पुस्तक सूची आरू अंगिका केरऽ प्रबुद्ध साहित्यकारऽ के सूची भी संलग्न करलऽ गेलऽ छै ।