अंगिका भाषा के नैका फिल्म 'अंगपुत्र' केरॊ शूटिंग जारी

भागलपुर (24.03.08)। अंगिका भाषा के नैका फिल्म 'अंगपुत्र' केरॊ शूटिंग इ दिना फिल्म के नायक सह अंगिका,भोजपुरी केरॊ सफल गायक छैला बिहारी, नायिका अपराजिता आरॊ टीम के अन्य साथी कलाकारॊ के साथ अंग प्रदेश के धरती पर चली रहलॊ छै.

संभावना छै कि शूटिंग अप्रैल में पूरा होय जैतै आरू जून केरॊ प्रथम सप्ताह में फिल्म रिलीज होय जैतै.

रौशन क्रियेशन आरू सरगम बिहार फिल्मस केरॊ बैनर तले अंगिका भाषा मॆं बनी रहलॊ इ नया फीचर फिल्म 'अंगपुत्र' के शूटिंग लेली भागलपुर पहुँचै वाला जनॊ मॆं सुनील छैला बिहारी के अलावा प्रचारक संतोष सावन,फिल्म केरॊ दोसरॊ कलाकार सीनी राकेश पाण्डे, ललितेश झा, छोटू छलिया, अपराजिता, रीमा सिंह, रीना रानी, मानसी पांडे, डा. अभय आशियाना, रेणु तिवारी, बलमा बिहारी, फिल्म केरॊ कैमरामैन आरआर प्रिंस, फिल्म केरॊ निर्माता संजय मलमल, अनिता बिहारी, फिल्म निर्देशक राजीव रंजन दास आदि शामिल छै.