*******************************************************
*********************************************************************
नैनो क्रिस्टल तकनीक सॆं खतम करलॊ जैतै आर्सेनिकयुक्त जल प्रदूषण
भागलपुर (Mar29, 2008) : शोध केरॊ क्षेत्र में आपनॊ धाक जमाय चुकलॊ तिलकामांझी भागलपुर विश्वविद्यालय केरॊ स्नातकोत्तर भौतिकी विभाग केरॊ दू वैज्ञानिकॊ नॆ नयॊ तकनीक(बायो सिंथेटिक रुट) सॆं धातुऒ कॆ नेनो क्रिस्टल बनाय कॆ देश मॆं इतिहास रचनॆ छै. इ तकनीक के खासियत इ छै कि एकरा सॆं पर्यावरण कॆ कोनॊ प्रकार के खतरा नै छै. वैज्ञानिक डा. कमल प्रसाद तथा डा. अनलकांत झा नॆ सिल्वर, टाइटेनियम, कैडमियम, सेलेनियम, एंटीमनी, टंगस्टन, गेडोलिनियम आदि धातु केरॊ नेनो क्रिस्टल तैयार करनॆ छै. दोनों वैज्ञानिकॊ नॆ दावा करनॆ छै कि इ तकनीक सॆं देश मॆं पहलॊ बार धातु के नेनो क्रिस्टल बनाबै मॆं हुनका सफलता मिललॊ छै. एक सप्ताह पूर्व दोनॊ वैज्ञानिकॆं लोहा तथा एकरॊ आक्साइड केरॊ नेनो क्रिस्टल बनाबै के तकनीक विकसित करनॆ छै. इ क्रिस्टल केरॊ उपयोग सॆं आर्सेनिक युक्त जल प्रदूषण कॆ समाप्त करलॊ जाबॆ सकै छै. वैज्ञानिकॆं डा. झा तथा डा. प्रसाद नॆ बतैलकै कि वर्तमान चिकित्सा विज्ञान मॆं नेनो लौह के आक्साइड्स केरॊ प्रयोग एमआरआई तकनीक मॆं करलॊ जाय रहलॊ छै. हुन्ने एगॊ महत्वपूर्ण घटनाक्रम मॆं मुख्यमंत्री नीतीश कुमार नॆ कल पटना मॆ कहलकै कि बगैर ट्रीटमेंट केरॊ अपशिष्ट व दूषित जल कॆ गंगा मॆं गिरै लॆ नै देलॊ जैतै. गंगा लगाँकरॊ घाटॊ सीनी के सौंदर्यीकरण इ तरह सॆं करलॊ जैतै कि वू पर्यटकॊ के लिहाज सॆं मनोरम बनॆ. मुख्यमंत्रीयें कहलकात कि गंगा किनारे स्थित विभिन्न जिला सब मॆं आर्सेनिक के स्थिति गंभीर छै. इ कारण लोग विकलांग होय जाय छै. राज्य सरकार इ मामला कॆ गंभीरता सॆं लै छै. लोहिया स्वच्छता योजना केरॊ प्रभावी क्रियान्वयन सुनिश्चित करैलॊ जाय रहलॊ छै. उधर गोमुख सॆं गंगासागर ताँय गंगा नदी कॆ राष्ट्रीय धरोहर घोषित करै के माँग भी उठैलॊ गेलै. भारत-बांग्लादेश के बीच करलॊ गेलॊ गंगा जल समझौते केरॊ वजह सॆं बिहार कॆ होलॊ क्षति केरॊ समीक्षा करी कॆ प्रदेश कॆ सही हक देलाबै के माँग भी उठैलॊ गेलै. .
****************************************************************************
*************************************************************************************