भागलपुर दंगाकांड : परबत्ती आरू भीखनपुर केरॊ सुनवाई अंतिम दौर मॆ

अगस्त, 31, 2009.

भागलपुर. भागलपुर दंगाकांड में अखनी तलक 325 अभियुक्तॊ कॆ सजा सुनैलॊ जाय चुकलॊ छै. न्यायालय मॆं पुलिस तरफॊ सॆ अभी तक 278 मामला मॆ आरोप पत्र दाखिल करलॊ जाय चुकलॊ छै. न्यायालय मॆ फिलहाल 40 मुकदमा लंबित छै.

दंगाकांड के सुनवाई करी रहलॊ न्यायालयॊ मॆ न्यायाधीशॊ के तैनाती नै होला के कारण बहुत दिना सॆं सुनवाई बाधित रहै. बाद में दंगाकांड केरॊ विशेष लोक अभियोजक मो. सलालुद्दीन खां तथा विशेष अपर लोक अभियोजक अतिउल्लाह नॆ इ न्यायालयॊ मॆ न्यायाधीशॊ के तैनाती शीघ्र करै लेली विधिवत पत्र लिखी कॆ मुख्यमंत्री तथा गृह सचिव सॆ गुहार लगैलकै. ओकरॊ बाद अदालतॊ मॆ न्यायाधीशॊ के तैनाती भेलै.

न्यायालय मॆं फिलहाल परबत्ती दंगाकांड तथा भीखनपुर दंगाकांड के सुनवाई अंतिम दौर मॆ छै. परबत्ती दंगाकांड मॆं आरोपी कामेश्वर यादव छेकै. अभियोजन पक्ष तरफॊ सॆं सात तारीखॊ के बहस के बाद गुरुवार कॆ अभियोजन पक्ष केरॊ गवाही समाप्त होय गेलै. इ मामला मॆं अबॆ सफाई पक्ष तरफॊ सॆं सफाई गवाह लेली न्यायालय नॆ दू सितंबर के तारीख मुकर्रर करनॆ छै.