विषहरी माता केरॊ अंतिम दर्शन लेली विसर्जन यात्रा मॆ उमड़लै श्रद्धालु

21 अगस्त,2009.

भागलपुर (Bhagalpur). अंगक्षेत्र केरॊ प्रसिद्ध विषहरी माता के पूजा के बाद बुधवार कॆ माता केरॊ प्रतिमा विसर्जन लेली स्टेशन चौक सॆं विशाल शोभा यात्रा निकाललॊ गेलै. स्टेशन चौक सॆं लंबा कतार मॆं माता विषहरी के प्रतिमा के विसर्जन शोभा यात्रा निकाललॊ गेलै. इ शोभा यात्रा कतार मॆं शहरी क्षेत्र केरॊ परंपरागत विसर्जन मार्गॊ सॆं गुजरतॆं देर शाम मायागंज स्थित मुसहरी गंगा घाट पहुंचलै.

प्रतिमा सब केरॊ विसर्जन विधिवत तरीका सॆं शाम सॆं आरंभ भेलै. परवत्ती मोहल्ला मॆं स्थापित विषहरी माता के प्रतिमा के पहलॊ विसर्जन छह बजे आरंभ हुोलै. इ मौका पर विषहरी महारानी केन्द्रीय पूजा समिति आरू श्रद्धालुऒ के सहयोग सॆं प्रतिमा के विसर्जन केरॊ पहलॆ पूर्व मुसहरी गंगा घाट पर माता के महाआरती आयोजित करलॊ गेलै. महाआरती मॆं भागलपुर के महापौर डा.वीणा यादव नॆ भाग लेलकै. पारंपरिक तरीका सॆं माता के आरती करलॊ गेलै.

विसर्जन शोभा यात्रा केरॊ स्टेशन चौक सॆं कूच करला के बाद जोगसर, आदमपुर, मानिक सरकार, खंजरपुर आदि इलाका मॆ काफी संख्या मॆ श्रद्धालुऒ के भीड़ विसर्जन मार्ग पर प्रतिमा सब के अंतिम दर्शन लेली इंतजार करी रहलॊ छेलै. श्रद्धालुऒ केरॊ बड़ा जत्था विसर्जन मार्ग मॆं प्रतिमा सब के दर्शन करी विसर्जन घाट पर पहलॆ सॆं पहुंची गेलॊ रहै. वहां मेला एन्हॊ नजारा रहै.

हिन्नॆ मनषा विषहरी महारानी महानगर केन्द्रीय पूजा समिति नॆ खराब मौसम केरॊ वजह सॆं परवत्ती केरॊ मनसा विषहरी विहुला के शोभायात्रा बिलंब सॆं पहुंचला पर खेद व्यक्त करलकै. प्रतिमा विसर्जन शोभा यात्रा मॆं सिविल सर्जन केरॊ तरफ सॆं एंबुलेंस उपलब्ध करैलॊ गेलॊ रहै.