अंगिका सिखाबै लेली कार्यशाला आयोजित

5 सितम्बर, 2009.

गोड्डा (Godda, Jharkhand,India). अंगिका भाषा-भाषी छात्रॊ कॆ शत-प्रतिशत सफलता दिलाबै कॆ लॆ कॆ बाल विकास विद्यालय परिसर मॆं 30 अगस्त कॆ अखिल भारतीय साहित्य कला मंच जिला इकाई केरॊ ओर सॆं एक कार्यशाला के आयोजन करलॊ गेलै.

प्रदेश महासचिव डा. प्रदीप प्रभात नॆ बतैलकै कि उर्दू प्राथमिक शिक्षक प्रतियोगिता व सिपाही नियुक्ति परीक्षा सब मॆ 30 व 100 अंकॊ के प्रश्न अंगिका भाषा सॆं पूछै जाबै के प्रावधान करलॊ गेलॊ छै. इ उद्देश्य सॆं इ शिक्षण कार्यक्रम के आयोजन करलॊ गेलॊ छै. हुनी अंगिका के वर्तनी, व्याकरण, फेफडुा आरू लोरी, लोकोक्ति आदि पर वृहत रूप सॆं प्रकाश डाललकै.

प्रशिक्षक केरॊ रूप में मंच केरॊ कार्यकारी महासचिव ब्रह्मदेव कुमार नॆ अंगिका भाषा विज्ञान के चर्चा करलकै तथा अंगिका भाषा कॆ लिखै के कला बतैलकै.

अंगिका भाषा शिक्षण कार्यक्रम के आयोजन बाल विकास विद्यालय परिसर मॆ एक सप्ताह तलक करलॊ जैतै.