सुल्तानगंज मॆ नया स्टेशन भवन बनी कॆ तैयार

5 सितम्बर, 2009.

सुल्तानगंज (Sultanganj,Bihar,India). सुल्तानगंज स्टेशन केरॊ नया भवन बनी कॆ तैयार होय गेलॊ छै. नया स्टेशन भवन मॆं कार्यालय केरॊ स्थानांतरण के प्रक्रिया शुरू करी देलॊ गेलॊ छै. ऐन्हॊ मानलॊ जाय रहलॊ छै कि बिना उद्घाटन के ही नया भवन मॆं कार्यालय के काम शुरू होय जेतै.

साढ़े तीन करोड़ रूपया केरॊ लागत सॆं अजगवीनाथ मंदिर केरॊ नक्शा पर बनलॊ इ भवन कॆ बनाबै के घोषणा पूर्व रेलमंत्री लालू प्रसाद नॆ तीन वर्ष पहिनै करनॆ रहै.

नैका स्टेशन भवन मॆं चार सामान्य टिकट काउंटर, चार आरक्षण काउंटर, पूछताछ काउंटर, वीआईपी लेली कमरा, सामान्य विश्रामालय, एसी विश्रामालय, फूड प्लाजा, स्टेशन प्रबंधक के कार्यालय आदि केरॊ व्यवस्था छै. फिलहाल नया स्टेशन भवन मॆ सामान्य टिकट काउंटर, आरक्षण टिकट काउंटर, पूछताछ काउंटर लॆ जाबै के योजना बनैलॊ गेलॊ छै. सूत्रॊ के कहना छै कि मालदा मंडल कार्यालय केरॊ वरीय डीसीएम नॆ इ आशय केरॊ निर्देश जारी करी देनॆ छै. एकरॊ बाद अन्य कार्यालयॊ के स्थानांतरण के योजना छै.

भवन, घाट रोड जाय वाली सड़क केरॊ ठीक सामने बनैलॊ गेलॊ छै. भवन केरॊ सामने मॆ काफी बड़ॊ जगह छै जहां लोग आराम सॆं वाहन पार्किंग करॆ सकॆ छै. परिसर मॆं स्ट्रीट लाइट के व्यवस्था छै. पुरनका भवन मॆ इ सब चीजॊ के सुविधा नै रहै आरू टिकट कटाबै मॆं यात्रियॊ कॆ भारी परेशानी के सामना करॆ पड़ॆ छै. सूत्रॊ के कहना छै कि सुल्तानगंज केरॊ नया स्टेशन भवन केरॊ उद्घाटन के योजना श्रावणी मेला के पहिनै बनैलॊ गेलॊ रहै, लेकिन ऐन्हॊ संभव नै होलै.