एल एण्ड टी झारखंड मॆ लगैतै विद्युत ताप घर

4 सितम्बर, 2009.

भागलपुर (Bhagalpur). झारखंड केरॊ संथाल परगना मॆं एल एण्ड टी 10 हजार करोड़ रुपए के लागत सॆं विद्युत ताप घर लगैतै. एकरा लेली केंद्रीय ऊर्जा विभाग सॆं बात चली रहलॊ छै.

बुधवार कॆ इ बात एनटीपीसी कहलगांव केरॊ मानसरोवर गेस्ट हाऊस मॆं गोड्डा के भाजपा सांसद निशिकांत दूबॆ नॆ पत्रकारॊ सॆ कहलकै. हुनी मौका पर कहलकै कि कहलगांव केरॊ वृहद औद्योगिक केंद्र केरॊ प्रांगण मॆं स्टार सिमेंट फैक्ट्री 500 मेगावाट के विद्युत ताप संयंत्र स्थापित करतै.

ईसीएल कंपनी केरॊ प्रबंधन कॆ कहलगांव, फरक्का आरू अन्य बिजली घरॊ मॆं कोयला संकट कॆ देखतॆं हुऎ आरू एक कोयला खदान चालू करै के लेली पत्र लिखनॆ छै ताकि बिजली घरॊ के कोयला संकट समाप्त हुऎ. सांसद नॆ कहलकै कि इ वित्तीय वर्ष मॆं एनटीपीसी विकास योजना के तहत बेलबड्डा मॆं पुलिस भवन निर्माण, स्टेट बोरिंग तथा महगामा कालेज के निर्माण होतै आरू अगला वित्तीय वर्ष मॆ गजण्डा मॆ स्टेट बोरिंग करैलॊ जैतै.

एनटीपीसी द्वारा जे 6 भू-विस्थापित गांवॊ कॆ गोद लॆ के योजना छै, ओकरा मॆ तीन गांव गोड्डा आरू तीन भागलपुर के रहतै. एनटीपीसी द्वारा 05 किलोमीटर केरॊ दायरा मॆ बिजली आपूर्ति कराबै के योजना के अंतर्गत विक्रमशिला बटेश्वर स्थान के इलाका भी शामिल होतै.